Urner Quarkbanzogglä mit Alpkäse und Apfel-Birnen Kompott

Ürner Quarkbanzogglä mit Alpchääs und Epfel-Birä Kompott

Züätatä (fir 4 Personä):

250 g Nitläquark
5 Äijer
1 dl Wasser
1 Prisä frisch gmahlni Muschgetnuss
500 g Mähl
2 Epfel, i Schnitzli
2 Birä, i Schnitzli
1 Theeleffel Magäträässech (Zigerchrapfägwirz)
ä Schpritzer Zitronäsaft
2 Zwibelä i Schtriifä gschnittä, Chochbutter
1 dl Halbrahm
250 g Ürner Alpchääs, griibä

Züäberäitig:

1. Fir ä Banzogglätäig Quark, Äijer, Wasser und Muschgetnuss güät verriärä. Mit em Mähl wird inärä Schisslä ä Chranz gformet. De tüät mä ä chli Salz drzüä, und siiferli wird etz dr Quark und ds leew Wasser drzüäggä. De schlaat mä hinderänander d Äijer innä, dass äs ä dickflissigä Täig ergit. Der Täig wird mitämä Geschner (Schwingbäsä) chreftig gschlagä, dass sich uf dr Oberflächi Blasä bildet.

2. Fir ds Kompott d Fruchtschnitzäli imänä Pfänntli mit äs bitzäli Wasser und Zimmet ca. 10 Minütä üfchochä, bis si lind sind, aber nu Biss hent. Wenn neetig Magäträässech und am Schluss ä Schpritzer Zitronäsaft drzüägää.

3. D Zwibelä inärä Bratpfannä i wenig Chochbutter goldig bratä, Halbrahm drzüägää, churz schwänkä.

4. Imänä groossä Chochtopf Salzwasser häiss machä, dr Quarkbanzogglätäig wird ufämä Schpätzlibrätt mit em Mässer i ds siidig häss Wasser gschnittä. Sobald d Banzogglä a d Oberflächi schtiiget, abschepfä, mit em gripnä Chääs laagewiis inä Schisslä gä. Am Schluss ds Zwibelä-Rahmgmisch drubergää und churz la ziä. Zämä mit em Kompott serviärä.

Gaschthüüs Feld

Als Grundelemänti brüücht ds Team im Gaschthüüs Feld frischi, hiäsigi und säsonali Produkti, wo mit vil Liäbi verfiineret wärdet. Dr Beat Walker und dr Marco Helbling fiäret i dr fiiftä Generazion dr Betriib i kulinarisch sibetä Himel.

Website Gaschthüüs Feld

Genossenschaft Urner Alpkäseproduzenten

Kornmattstrasse 16, 6460 Altdorf
Telefon: +41 (0)79 343 07 28, mail@remove-this.urneralpkäse.ch

Social Media

Folg iis uf Facebook | Google+

© 2019  -  Impressum | Sitemap