D Alp Etzli liit im Talchessel vum Etzlital, äm südlichä Sitätal vum bekanntä Madranertal. Am Taländi liit d Etzlihittä vum Schwizerischä Alpä-Club. Vu dettä üs cha mä uber ä Chrizlipass i ds Val strem im Pintnerland durä. D Wäidä im underä Tal gheeret all zur Alp Etzli. Da semmeret gägä 80 Chiäh. Diä gheeret dä elf Alpgnossäschafterä, wo äü d Sännhittä und dr Schtall uf 1339 Meter zämähaft nutzet.

Uf dr Alp Etzli wärdet näbet äm Häüptprodukt, äm Ürner Alpchääs i Form vu Mutschli, äü Ziger, Ankä und ä groossä Schibel Joghurt fabriziärt. Diä Produkt chennet im Alpbäizli ggässä und uf dr Alp äü gchäüft wärdä. Ä Täil vum Joghurt liferet d Alpgnossäschaft a Ürner Läbesmittelgschäfti. Dr Chääs täilet d Gnossäschafter under sich üf und verchäüfet ä de ab Hof.